ब्रेकिंग

अनधिकृत अतिक्रमणावर कारवाई

Wrutuja pandharpure
14 May 2025

पुणे : शहरातील वाढत्या अतिक्रमणांबाबत नागरिकांच्या तक्रारी वाढल्याने आणि वाहतूकीस अडथळा निर्माण होत असल्याने महापालिका आयुक्तांच्या आदेशानुसार महापालिकेच्या अतिक्रमण निर्मूलन विभागाने दोन ठिकाणी मोठ्या प्रमाणावर संयुक्त कारवाई केली.

धनकवडी-सहकारनगर हद्दीतील कारवाई

भारती विद्यापीठ गेटच्या मागील भाग, त्रिमूर्ती चौक आणि राजर्षी शाहू बँक सातारा रस्ता ते गुलाबनगर या परिसरात झालेल्या कारवाईत रस्ते, पदपथ तसेच इमारतींच्या फ्रंट व साइड मार्जिनमध्ये केलेल्या अतिक्रमणांवर कठोर कारवाई करण्यात आली. या कारवाईत सुमारे ५,००० चौरस फुटांचे कच्चे व पक्के बांधकाम उपआयुक्त संदीप खलाटे, सहाय्यक आयुक्त तिमय्या जंगले यांच्या मार्गदर्शनाखाली करण्यात आली. कारवाईसाठी विभागीय अतिक्रमण अधिकारी, अभियंते, निरीक्षक, पोलीस कर्मचारी, महाराष्ट्र सुरक्षा बल आणि बिगारी सेवकांचा सहभाग होता.

कसबा विश्रामबाग हद्दीतील कारवाई

लाल बहादूर शास्त्री रस्त्यावरील मांगीरबाबा चौक ते अल्का टॉकीज चौकदरम्यान अतिक्रमणांवर संयुक्त कारवाई करण्यात आली. या कारवाईत ३,४०० चौरस फुटांचे शेड हटवण्यात आले, तसेच खालील साहित्य जप्त करण्यात आले :

स्टॉल - १, काऊंटर - ७, शेड - ७, इतर साहित्य -२०

सिलेंडर - २ जप्त साहित्य -४ ट्रकमध्ये भरून नेले. ही कारवाई उपआयुक्त संदीप खलाटे, उपआयुक्त सुनील बल्लाळ, सहाय्यक आयुक्त सुहास जाधव यांच्या नेतृत्वाखाली पार पडली. बांधकाम विकास विभागाचे अधिकारी, अतिक्रमण निरीक्षक, मनपा पोलीस, महाराष्ट्र सुरक्षा बल आणि विश्रामबाग पोलीस स्टेशनच्या मदतीने ही कारवाई राबवण्यात आली.